அதிக விக்கெட் எடுத்து மத்யூஸ் உலகசாதனை: அதனால்தான் அணியிலிருந்து நீக்கம்!

0

இலங்கை அணியின் கப்டன் பொறுப்பிலிருந்து நீக்கப்பட்ட அஞ்சேலோ மத்யூஸ், தற்போது அணியிலிருந்தும் நீக்கப்பட்டதற்குக் காரணம் என்ன என்பதை இலங்கை பயிற்சியாளர் ஹதுரசிங்க வெளியிட்டுள்ளார்.

ஆசியக் கோப்பையிலிருந்து படுதோல்வியடைந்து வெளியேறியது இலங்கை. இதனையடுத்து மத்யூஸை நீக்கும் முடிவை எடுக்க, அதற்கு இவரும் பெரிய கடிதம் மூலம் ‘தான் பலிகடாவா’ என்று கேட்டு இலங்கை கிரிக்கெட் வாரியத்தை தர்ம சங்கடத்தில் ஆழ்த்தியுள்ளார்.

அணியிலிருந்து தான் நீக்கப்படுவோம் என்று மத்யூஸ் சற்றும் எதிர்பார்க்காத நிலையில், அவர் நீக்கப்பட்டுள்ளார்.

மத்யூஸ் நீக்கத்திற்கான காரணங்களையும் ஹதுரசிங்க வெளியிட்டுள்ளார்.

அதாவது பந்துவீச்சை நிறுத்தி விட்ட மத்யூஸ், துடுப்பாட்டத்தில் சகவீரர்களின் விக்கெட்டுகளை எடுத்துக் கொண்டிருந்தார், அதனால்தான் நீக்கம் என்று சூசகமாகத் தெரிவிக்கிறார் பயிற்சியாளர் ஹதுரசிங்க.

விக்கெட்டுகளுக்கிடையே ஓடுவதில் மத்யூஸ் மந்தமாக இருப்பதோடு எதிர்முனை வீரர்களையும் ரன் அவுட் ஆக்கி ‘விக்கெட்டுகளை’ எடுத்து விடுகிறார் மத்யூஸ் என்பதே ஹதுரசிங்கவின் காரணமாக உள்ளது.

இதனை இலங்கை அணியின் தேர்வுக்குழு தலைவர் கிரேம் லெப்ராய் ஈஎஸ்பிஎன் கிரிக் இன்போ இணையதளத்துக்கு தெரிவித்துள்ளார்.

மத்யூஸ் ரன் ஓடுவதில் மந்தமாக இருக்கிறார் என்பதோடு லெப்ராய் நிறுத்திக் கொள்ள, பயிற்சியாளர் சந்திகா ஹதுரசிங்க இன்னும் ஒரு படி மேலே போய் தனது மோசமான ரன் ஓட்டத்தினால் தன்னுடன் ஆடுபவர்களை ரன் அவுட் ஆக்கி விடுகிறார் மத்யூஸ் என்று குற்றம்சாட்டினார்.

ரன் அவுட்டில் இவர் பங்கேற்பாளராக இல்லை, மாறாக எதிர்முனை ஆட்டக்காரரரை ரன் அவுட் ஆவதற்கும் மத்யூஸ் காரணமாக விளங்குகிறார் என்கிறார் ஹதுரசிங்க.

மேலும் 50 ஓவர்கள் களத்தில் பீல்ட் செய்வதற்கும் பிறகு துடுப்பாட்டம் செய்வதற்குமான உடற்தகுதி மத்யூஸிடம் இல்லை. அணி வீரர்களே அவரைச் சுமையாகக் கருதுகின்றனர் என்ற குண்டையும் ஹதுரசிங்க தூக்கிப் போட்டுள்ளார்.

“64 ரன் அவுட்டுகளில் மத்யூஸ் பங்கு உள்ளது, இதில் 49 முறை எதிர் முனை ஆட்டக்காரர் இவரால் ரன் அவுட் ஆகியுள்ளார். இது உலக சாதனை. இது போன்ற விஷயங்களைத்தான் நாங்கள் பார்க்கிறோம். ஆனால் அவர் விரைவில் இந்தக் குறைகளைச் சரிசெய்து கொண்டு மீண்டும் இலங்கை கிரிக்கெட்டுக்கு சேவை செய்ய வேண்டும் என்றே விரும்புகிறோம்.” என்கிறார் ஹதுரசிங்க.

LEAVE A REPLY

Please enter your comment!
Please enter your name here