ஆடு திருட்டில் ஈடுபட்ட 2 நடிகர்கள் கைது: படமெடுக்க திருடினார்களாம்!

சென்னையில் ஆடு திருடிய வழக்கில் சினிமா நடிகர்கள் கைது செய்யப்பட்டிருக்கின்றனர். அவர்களிடமிருந்து சொகுசு காரையும் போலீஸார் பறிமுதல் செய்திருக்கின்றனர்.

சென்னை மாதவரத்தைச் சேர்ந்தவர் பழனி. இவருக்குச் சொந்தமாக ஆடுகள் இருக்கின்றன. இவர் வளர்த்துவந்த ஓர் ஆடு, கடந்த அக்டோபர் 9-ம் தேதி திருட்டுப்போனது. இது குறித்து பழனி, மாதவரம் காவல் நிலையத்தில் புகாரளித்தார். அதன்பேரில் போலீஸார் ஆட்டைத் தேடிவந்தனர்.

உதவி கமிஷனர் அருள்சந்தோஷமுத்து, இன்ஸ்பெக்டர் முருகன் மற்றும் போலீஸார் ஆடு திருட்டு குறித்து விசாரித்தனர். விசாரணையில் ஆடுகளைத் திருடும் இளைஞர்கள் குறித்த ரகசியத் தகவல்கள் கிடைத்தன.

இது குறித்து மாதவரம் போலீஸார் கூறுகையில் “சென்னைப் புறநகர் பகுதிகளில் அடிக்கடி ஆடுகள் திருடப்பட்டு வந்தன. ஆனால், அது தொடர்பாக பலர் காவல் நிலையங்களில் புகாரளிப்பதில்லை. பழனி அளித்த புகாரின் பேரில் மாதவரம், மஞ்சம்பாக்கம், ரிங் ரோடு பகுதியில் போலீஸார் ரோந்துப் பணியில் ஈடுபட்டுக்கொண்டிருந்தோம். அப்போது சொகுசு காரில் வந்த இளைஞர்கள் இருவர், சாலையில் படுத்துக் கிடந்த ஆட்டைத் தூக்கி, ஒரு காருக்குள் ஏற்றிக்கொண்டிருந்தனர்.

அதைப் பார்த்தும் அவர்கள் மீது எங்களுக்குச் சந்தேகம் எழுந்தது. உடனே அவர்களை மடக்கிப் பிடித்தோம். பின்னர் இருவரையும் மாதவரம் காவல் நிலையத்துக்கு அழைத்து வந்து விசாரித்தோம். விசாரணையில் அவர்களின் பெயர் நிரஞ்சன்குமார் (36), லெனின்குமார் (32) எனத் தெரியவந்தது. இவர்கள் இருவரும் அண்ணன் தம்பிகள். நிரஞ்சன்குமாரின் தந்தை சினிமா படத் தயாரிப்பாளர். லெனின்குமார் பெயரில் படத் தயாரிப்பு நிறுவனத்தை நடத்திவந்திருக்கிறார்கள். அதில் நஷ்டம் ஏற்பட்டதாகச் சொல்லப்படுகிறது. `நீதான் ராஜா’ என்ற படத்தை சமீபத்தில் எடுத்திருக்கின்றனர். அந்தப் படத்தில் நிரஞ்சன்குமாரும் லெனின் குமாரும் நடித்திருக்கின்றனர்.

படத்தைத் தயாரிக்க பணம் தேவைப்பட்டதால், ஆடு திருட்டு சம்பவத்தில் இருவரும் ஈடுபட்டிருக்கின்றனர். இதற்காக சொகுசு கார் மற்றும் மினி லாரி ஆகிய வாகனங்களைச் சொந்தமாக வாங்கியிருக்கின்றனர். அவற்றில்தான் ஆடுகளைத் திருடி, சென்னையில் விற்றுவந்திருக்கின்றனர். கடந்த மூன்று ஆண்டுகளாக ஆடு திருட்டில் இவர்கள் ஈடுபட்டு வந்திருக்கின்றனர். இதையடுத்து இருவரையும் கைதுசெய்து புழல் சிறையில் அடைத்திருக்கிறோம். ஆடுகளைத் திருடப் பயன்படுத்திய வாகனங்களையும் பறிமுதல் செய்திருக்கிறோம்” என்றனர்.

LEAVE A REPLY

Please enter your comment!
Please enter your name here