அதிகரிக்கும் டெங்கு, எலிக்காய்ச்சல்!


இலங்கையின் பல பகுதிகளில் டெங்கு மற்றும் எலி காய்ச்சல் அதிகரித்துள்ளதாக தொற்றுநோயியல் பிரிவு எச்சரித்துள்ளது.

கடந்த ஆண்டுடன் ஒப்பிடும்போது இந்த ஆண்டின் முதல் காலாண்டில் டெங்கு நோயாளிகளின் எண்ணிக்கை குறைந்துள்ள போதிலும், டெங்கு பரவுவதில் அதிகரிப்பு இருப்பதாக மருத்துவர்கள் கூறுகின்றனர்.

கொரோனா முடக்க காலத்தில், பொதுமக்கள் வீடுகளில் இருந்து தமது சுற்றுப்புறங்களையும், தோட்டங்களையும் சுத்தமாக வைத்திருந்தது,  டெங்கு கட்டுப்பாட்டிற்கு  காரணங்களில் ஒன்று.

மாகாணங்களுக்கு இடையிலான பயணத்தை கட்டுப்படுத்தியது மற்றொரு காரணியாகும். தலைமை தொற்றுநோயியல் நிபுணர் வைத்தியர் சுதத் சமரவீர கூறுகையில், மக்கள் தங்கள் சாதாரண கடமைகளுக்குத் திரும்புவதன் விளைவாக டெங்கு பரவுவதற்கான அபாயத்தை அதிகரித்துள்ளது என்றார்.

மேற்கு மாகாணத்திலேயே அதிகளவான டெங்கு நோயாளர்கள் அடையாளம் காணப்பட்டுள்ளனர். இருப்பினும், இலங்கையின் ஒவ்வொரு மாவட்டத்திலும் டெங்கு ஏற்படும் அபாயம் உள்ளது.

இதேவேளை, கொரோனா தடுப்பு நடவடிக்கை காலத்தில் பலரும் விவசாயத்தில் ஆர்வம் காட்டியதால் எலி காய்ச்சல் பரவும் அபாயம் அதிகரித்துள்ளதாக சுகாதார அதிகாரிகள் சுட்டிக்காட்டுகின்றனர்.

நெல் வயல்களில் வேலை செய்யும் விவசாயிகள் இது குறித்து அதிக கவனம் செலுத்த வேண்டும் என்று தலைமை தொற்றுநோயியல் நிபுணர் வைத்தியர் சுதத் சமரவீர தெரிவித்தார்.

நிலவும் மழைக்காலத்திற்குப் பிறகு டெங்கு தொற்றுநோயை ஒழிக்க உடனடியாக தயாராகுமாறு ஆளுநர்கள், உள்ளாட்சித் தலைவர்கள் மற்றும் சுகாதார அதிகாரிகளுக்கு ஜனாதிபதியும் பிரதமரும் அறிவுறுத்தியுள்ளனர்.

ஒவ்வொரு ஆண்டும் மேற்கு மாகாணத்தில் இருந்து அதிக எண்ணிக்கையிலான டெங்கு நோயாளிகள் அடையாளம் காணப்படுகிறார்கள். நாட்டின் பிற பகுதிகளிலிருந்து தினமும் ஏராளமான மக்கள் இந்த பகுதிக்கு வருவதால் மேற்கு மாகாணத்தில் டெங்கு ஒழிப்பு முன்னுரிமையளிக்கப்பட வேண்டுமென ஜனாதிபதி சுட்டிக்காட்டியுள்ளார்.

இது தொடர்பாக அனைத்து உள்ளூர் அதிகாரிகள், சுகாதார அதிகாரிகள் மற்றும் சுற்றுச்சூழல் காவல்துறை தீவிரமாக செயல்பட வேண்டும் என்றும் வலியுறுத்தப்பட்டது. டெங்கு தடுப்பு தொடர்பான ஜனாதிபதி பணிக்குழுவுடன் நடைபெற்ற சிறப்பு கலந்துரையாடலின் போது ஜனாதிபதி இந்த கருத்துக்களை தெரிவித்தார்.

LEAVE A REPLY

Please enter your comment!
Please enter your name here